ក្រុមហ៊ុនរថយន្ដស៊ុយអែត Volvo ថ្មីៗនេះ​ បានប្រកាស បញ្ចេញរថយន្ដអគ្គិសនីសេរី ២០២៤ របស់ខ្លួន ចំនួន ២ ម៉ូដែល ដែលទើបកែប្រែសមត្ថភាពឲ្យល្អជាងមុនថ្មីថ្មផង គ្រោងមកប្រជែងទីផ្សារឡានអគ្គិសនីនឹងក្រុមហ៊ុនធំៗបច្ចុប្បន្ននៅ ឆមាសទី ២​ ឆ្នាំ ២០២៣ នេះ។ 

រថយន្ដអគ្គិសនីទាំងពីរម៉ូដែលនេះមានដូចជា Volvo C40 Recharge និង Volvo XC40 Recharge ឆ្នាំ ២០២៤ ដែលជាប្រភេទឡាន SUV ជាមួយនឹងការកែសម្រួលសមត្ថភាព ប្រសើរជាងមុន ដូចជាមានបំពាក់ម៉ូទ័រអគ្គិសនីជំនាន់ថ្មី មានជម្រើស ២ ប៉ុង១ ថ្មថាមពល ៨២ kWh ផលិតកម្លាំង ២៤៨ សេះ​ សាកម្ដងរត់បាន ៤៧១ គម សម្រាប់ Volvo XC40 Recharge និង ៤៧៧ គម សម្រាប់ Volvo C40 Recharge ក្នុងនេះវាអាចសាកថ្មចូលបានលឿន ពី ១០% ទៅ ៨០% ប្រើពេល ២៨ នាទី ។

សម្រាប់ជម្រើសប៉ុង ២ AWD ប្រើម៉ូទ័រអគ្គិសនី ២ មានថ្មថាមពល ៧៨ kWh និងសាកពេញម្ដងបើកបាន ៤០៨ គម សម្រាប់ XC40 Recharge និង ៤១៣ គម សម្រាប់ C40 Recharge ។ 

Volvo បានឲ្យដឹងដែរថា ខ្លួននឹងបន្ដការផលិតរថយន្ដអគ្គិសនីនេះ រហូតសម្រេចផែនការផលិតឡានអគ្គិសនីសុទ្ធ សម្រាប់ឆ្នាំ ២០៣០ ហើយ ម៉ូដែលទាំងពីរ​នេះ នឹងចេញដំបូងក្នុងទីផ្សារអាមេរិក នៅឆមាសទី ២ ឆ្នាំ ២០២៣ នេះ ដែលក្រុមហ៊ុន ក៏គ្រោងនឹងណែនាំ EX90 សេរីថ្មី មកកាន់ទីផ្សារផងដែរ រីឯតម្លៃវិញគឺចាប់ផ្ដើមពី ៥០ ០០០ ដុល្លារឡើងទៅ។ 

ប្រភព៖ Volvo 

អត្ថបទ៖ Andra